Walaa A Bakry يكتب خطة بريطانيا لمواجهة كورونا .
الجزء الأول .
الحكومه البريطانية بتاخد مخاطره شايفاها محسوبه إعتماداً على رأي علماء الحكومه. ولكن خبراء تانيين شايفينها مش محسوبه وانها بتستخدم الشعب البريطاني كفئران تجارب. الخطه كلها منشورة في ٢٨ صفحه أول تعليق
الخطه بتعتمد على هدفين رئيسين:
1. خلق مناعه القطيع (herd immunity). يعنى تخلي اكبر عدد ممكن يصاب بالفيروس و ده هايخلي جزء من الشعب عنده مناعه ويقلل نسبة العدوى تلقائيا
2. تأخير ذروة الازمه (peak) لأطول فتره ممكنه. وتخفيض حجم حالات الذروة مقابل فترة اطول لادارة ذروة منخفضه (يعنى بدل مايبقى قمة الازمه ١٥ الف حاله لمده ٥ أسابيع وتفلت منهم زي ايطاليا) تبقى ١٥ ألف حاله لمده ١٠ أسابيع- مثلاً)تحديث: حطيت رسمه يدويه ف التعليقات. تشرح النقطه دي.
3. الخطه ليها أهداف تانيه مهمه مثل تقليل آثار الأزمة السلبيه على المجتمع والاقتصاد وده بيفسر بعض القرارات. وازاي جميع اجهزة الدوله هتتعامل مع بعضها أثناء الازمه. وخلق ثقه بين المجتمع وقرارات الحكومه. ودور المواطنين.
4. المواطن البريطاني معروف بطواعيته للقانون. يعنى أقعد ف البيت اسبوعين بيقعدوا ف البيت حتى لو متذمر . ماحصلش ده في ايطاليا
5. طب إيه الفكرة؟ الحكومة على لسان رئيس الوزراء بتعترف ان في ناس كتيره هاتموت قبل عمرها الطبيعي. ده كان تصريح فاجع للشعب. ولكن في المقابل عدد اكبر بكتير من الشعب قد يصل ل ٦٠٪ ها يصاب بالفيروس و ٨٠٪ منهم هايخف من غير أي علاج. مجرد انهم يقعدوا فى البيت لمدة تتراوح مابين أسبوع أو أسبوعين. و ١٩٪ هايحتاجوا علاج بسيط و معظمهم في البيت برضه
6. #الاصطفاف_الوطني: الشعب الإنجليزي قلقان والفار بيلعب في عبه. الحكومه جابت زعماء المعارضه وعرضت عليهم الخطه وبإعتبار ان دي أزمة قوميه المعارضه وقفت خلف الحكومه وحاطه إيديها على قلبها. واتفقوا مايكلموش عن أي خطط تانيه عشان مايحصلش بلبله بين الشعب .
7. بعد خطاب جونسون الصادم من يومين المعارضه قالت ماشي على مضض بس ممكن نشوف الموديل اللي علماء الحكومه بيشتغلوا على أساسه؟ الحكومه ماكدبتش خبر و تانى يوم لموهم فى أوضه وقفلوا الباب وخلوا علماء الحكومه يفرجوهم على الموديل.
8. المعارضه لسِه برضه حاطه إيديها على قلبها وبتعارض خفيف على استحياء لإن علماء الحكومه فطاحل عالميين لاغبار عليهم وصعب جداً يكونوا بيخرفوا
9. علماء الحكومه (الطبيب العام إسمه كريس ويتي ف الصوره ع الشمال والعالم العام إسمه باتريك ڤالانس ف الصوره ع اليمين- دي مناصب حكوميه زي النائب العام كده 😏) مسخرين فطاحل تانيين فى مراكز الابحاث البريطانيه يجمعوا بيانات عن كورونا من جميع انحاء العالم ويعملوا نماذج إحصائيه عن انتشار العدوي ونتائج الاساليب اللي كل دوله استخدمتها وفاعليتها فى حظر العدوى
10. النماذج دي (models) توصلت الى ان منع التجمعات العامه في الهواء الطلق في أول الازمه فايدته قليله. وإيه يعنى لما شويه يصابوا بالفيروس ما إحنا عايزين كده!
11. وصلوا برضه إن الناس الكبيره في السن وعندها أمراض بتأثر على مناعتهم غالباً هايموتوا من الفيروس بغض النظر هايجيلهم إمتى. فأحسن حل الحكومه تطلب من العواجيز مايروحوش التجمعات ويُفضل يموتوا على أطول فتره ممكنه. مش زي المناظر اللي شايفنها في إيران.
12. زمان فى مصر لو طفل ف العمارة جاله حصبه الاهالي كانوا يجيبوا اطفالهم يتعدوا من الطفل المريض عشان يخلصوا ! بريطانيا بتعمل نظريه مشابه شويه 😀 بس حطوا طفل واحد كل يوم مش كلهم في يوم واحد 😀13. طيب هل في أي فايدة من منع التجمعات؟ أيون. لو كانت هاتتطلب قوات بوليس او عربيات إسعاف واقفه مابتعملش حاجه. وغالبا هايمنعوا التجمعات الكبيره قريب للسبب ده مش عشان خايفين من إنتشار العدوى
14. الحكومه برضه وقفت عمل التحاليل إلا للحالات التي تحتاج زيارة المستشفى. ده برضه كان قرار صادم وعكس اللي دول تانيه بتعملوا وهو التوسع فى عمل التحاليل
15. طيب ليه هايرفعوا قدرة المعامل من ١٥٠٠ تحليل في اليوم الى ٢٠ الف تحليل ف اليوم؟ لان لما العدوة تصل الذروه في تقديرهم كمان ٤ أسابيع هايحتاجوا العدد ده.
16. طيب هايعرفوا عدد المصابين ازاي دلوقتي؟ علماء الإحصاء الفطاحل اللي الحكومه مشغلاهم قدروا يوصلوا الي نموذج إحصائي تحط فيه عدد التحاليل الإجمالية وعدد النتائج الإيجابية وتعداد الشعب يطلع لك تقريبا عدد المصابين بين الشعب من غير تحاليل. وفي تقديرهم حالياً ان عدد المصابين فى بريطانيا مابين ٥ و ١٠ آلاف مواطن ورئيس الوزراء طلع قال كده. صدمه تانيه للشعب ! لان العدد الرسمي ساعتها كان حوالي ٥٥٠ مصاب فقط.
17. طيب والمدارس؟ المدارس في بريطانيا لازم تسمع كلام الحكومه ماتقدرش تقفل على مزاجها زي الجامعات. نظريتهم ان الأطفال اقل نسبة بتتأثر بالفيروس حتى اللي بيتعدي بيخف بسرعه لوحده. إغلاق المدارس يعني جزء من العاملين بالوظائف المطلوبه هايقعدوا جنب عيالهم وده مش مطلوب او هايجيبوا اجدادهم العواجيز يقعدوا معاهم والعيال الصغيره لو حاملين الفيروس يعدوهم ويموتوهم وهو برضه غير مطلوب.
18. طيب ليه التلكيع ده مع انهم هايجي عليهم وقت لازم يقفلوا المدارس؟ لانهم بيشتروا وقت على أساس ان لو الفيروس ده هايسلك نموذج الفيروسات المشابه يبقى مع ارتفاع درجات الحرارة نسبه نقل العدوي المجتمعيه هاتقل.
19. طيب هل ممكن نظرية مناعة القطيع دي تفرقع فى وشهم؟ أيون في إحتمال. طيب هايعملوا إيه؟
20. وزير الخزانه اعلن في البرلمان انه هايدي الهيئه الوطنيه للتأمين الصحي شيك على بياض بمعنى الكلمه لمكافحة كورورنا يعنى بنتكلم فى عشرات المليارات بالاسترلينى. إقتصادهم يسمح بحركة زي دي
21. طب ولو الهيئه الوطنيه للتأمين الصحى ماقدرتش بالرغم من الفلوس؟ عاملين خطه ان الجيش هاينزل يساعد البوليس واحتمال يعمل مستشفيات ميدانيه وعندهم خبرة ضخمه في مكافحة ايبولا في افريقيا
22. ايه تانى؟ هايلغوا أي أعمال تتطلب إنشغال البوليس. والغوا فعلاً الانتخابات المحليه اللي كان المفروض تتعمل في مايو برضه. مش عشان خايفين من انتشار العدوى اثناء الانتخابات ولكن عشان لو احتاجوا البوليس يفرض حظر التجول في مدن بأكملها.
23. بيستغلوا التأخير للإجراءات الصارمه في ان كل المستشفيات تجهز نفسها وخاصة غرف التنفس الصناعي وعدد معامل التحاليل. عشان مافيش تحاليل تتنقل لمعامل بعيده وخطط اخذ التحاليل في البيت او في الشارع ويكون احسن
24. تقدير علماء الحكومه ان أي حظر صارم لانتشار الاصابه دون مناعه للقطيع (مناعه مجتمعيه) سيؤدي لعودة انتشار الفيروس في الشتاء القادم بشكل اكثر بشاعه.
25. هل في سبب تاني للتلكيع؟ أيون . بيصنعوا تحليل أسرع بكتير بيشوف إذا كان عندك الأجسام المضادة بتاع كورونا في خلال ١٠ دقايق وممكن تعمله في البيت وارخص بكتير وهايبتدوا يصنعوا منه ملايين لو اتوافق عليه الاسبوع الجاي.
26. في ناس بتعمل مقارنه بين نظرية الحكومه البريطانيه ونظرية الحكومه المصريه. دي مقارنه غير عادله لأسباب كثيره. ممكن تعرفها من العرض اللي فوق😏طبعاً لو الحكومه البريطانية نجحت العالم كله هايسقفلهم. لو فشلوا - الشعب البريطاني هايفشخهم دون الحاجه لأي تدخل خارجي
